Pensamentunan Suisidal
Si bo ta sinti esaki i bo ta sinti, ku bo por hasi bo mes daño aworaki, buska yudansa di emergensia mesora. Keda ku un otro persona mientras bo ta haña yudansa. Of yama 912, pa ambulance por hiba bo hospitaal.
Si bo tin pensamentunan suisidal, pero bo no ta den peliger inmediato, tuma kontakto ku 918 Ayudo pa Mucha i Hóben (LINK), pa haña sosten grátis i anónimo. 918 ta pa mucha, hóbennan i hóbennan adulto te ku 25 aña.
Bo por yega na nan via telefòn, chat òf WhatsApp, di djaluna te djabièrnè 10:00–18:00 i diasabra 12:00–18:00.
Si bo ta sinti bo mes kòmodo ku Hulandes òf Inglés, bo por chat ku 113 Suicide prevention 24/7.
Nan no ta nifiká ku bo ta débil, absolutamente ku no. Nan no ta nifika ku bo ta un persona inkompletu, kibra òf ku bo ta hasi algu robes. Bo no mester warda te ora e situashon bira pio te ku e ta bira un emergensia. Papia ku un persona, tempran. Bo meresé sosten i yudansa.
Purba awor
Si pensamentunan suisidal ta presentá, purba hasi e próksimo minútanan un tiki mas sigur pa bo mes i transforma nan pa bira mio. Bo no mester solushoná tur kos aworaki.
- Alehá bo mes di kualke peliger: Si tin algu serka ku por hasi bo daño, ta mas fásil pa bo hasi bo mes daño, alehá bo mes di dje òf bai un otro kamber. Keda den kontakto ku hende.
- No keda bo so ku bo pensamentunan: Sinta serka di un otro persona, sali bai pafó, bai huiskamer òf manda un mensahe na un hende. Keda serka di un hende.
- Nombra loke ta pasando: Bisa bo mes: “Esakinan ta pensamentunan suisidal. Mi no mester aktua riba e pensamentu aki aworaki.”
- Rekonosé i sa ku ta un pensamentu: Un pensamentu no ta nifiká ku bo mester aktua riba dje.
- Hala rosea mas trankil: Hala rosea aden durante 4 sekònde, tene pa 2 sekònde i saka rosea trankil durante 6 sekònde. Ripití esaki algun biaha. Si ora bo tene bo rosea ta sinti inkomodo, no ten'e i simplemente saka rosea mas largu pafo, ku bo ta hala aden.
- Hasi grounding: Nombra 5 kos ku bo ta mira, 4 kos ku bo ta sinti, 3 kos ku bo ta tende, 2 kos ku bo ta hole i 1 kos ku bo ta smaak.
Kon pensamentunan suisidal por mustra di ta?
Pensamentunan suisidal por ta diferente pa kada persona. Tin pensamentu ku ta direkt, manera: “Mi ke muri.” Otro pensamentunan ta ménos direkt òf mas konfuso, manera:
- “Mi no ke ta aki mas.”
- “Mi ta desea ku mi por disparsé.”
- “Tur hende lo ta mihó sin mi.”
- “Mi ke tur kos para.”
- “Mi no sa kon largu mas mi por sigui hasi esaki.”
No tur hende ku tin pensamentunan suisidal lo bisa kosnan asina, i no tur hende ku bisa kosnan asina ta suisidal.
Algun persona tambe por nota kambio den kon nan ta sinti òf kon nan ta komportá, spesialmente ora nan ta:
- Alehá nan mes di otro hende.
- Sinti ku nan ta un karga pa otro hende.
- Sinti desesperá, atrapá, ku kulpa òf ku berguensa.
- No tin interes mas den loke normalmente ta importante pa nan.
- No importá mas kiko ta pasa ku nan.
- Pèrde interes den kosnan ku normalmente nan ta stima òf ku ta importá pa nan.
- Usa alkohòl, droga, self-harm òf komportamentu riesgoso pa trata ku loke nan ta sinti.
- Sinti ku nan mester skonde kon malu nan ta sinti realmente.
E señalnan aki por tin hopi diferente motibu i no nesesariamente ta nifiká ku un persona ta suisidal. Pensamentunan suisidal por sosodé pa hopi diferente motibu.
Nan por ta relashoná ku kosnan manera: depresion, stress, duele, verdriet, dolor, trauma, deseperashon, perdida, bullying, problema den famia òf den un relashon, kiebro di relashon, problema ku sen, perde trabou, no wordu asepta, wordu rechasa of ekspulsa, soledat, ansiedat, abuso, uso di alkohòl òf droga, òf emoshonan atrapa, sinti atrapá i sin speransa. Hopi biaha ta varios kos ku ta akumulá huntu.
I ku bo no ta mira un solushon of un salida mas.
Pensamentunan suisido no ta nifiká ku bo bida a kaba. Nan ta nifiká ku bo mester sosten i yudansa. Bo no mester komprondé tur kos promé ku bo pidi yudansa. Buska 1 hende pa yuda bo.
Ki ora pa papia ku un persona òf buska yudansa urgente?
Bo no mester warda te ora bo ta sinti ku bo ta tin sentimimentunan suisidal, ku a krese bira, sufisiente hopi.
Si e pensamentunan ta presente, esaki so ta un bon motibu pa papia ku un hende.
Buska yudansa urgente si:
- bo tin un plan pa hasi bo mes daño;
- bo ta sinti ku bo no por tene bo mes sigur mas, foi peliger.
- bo ta sinti ku bo por aktua riba e pensamentunan suisidal un bes of pronto.
- e pensamentunan ta bira mas i mas difísil pa kontrolá.
Kòrda:
Bo no ta débil i bo no ta un karga.
Bo no ta bo pensamentunan. Tuma bo mes na serio i no purba trata ku esaki bo so.
Unda mi ta haña yudansa?
Yama 912 awor
Si bo ta den peliger inmediato òf bo ta hopi malu.
Yama òf chat ku 918!
Bo por yama tambe òf chat ku e number 918 (Djaluna pa Djabierne 10:00-18:00, Djasabra 12:00-18:00) Anonimo i gratis pa mucha, hoben i adulto te ku 25 aña.
Chat 24/7 ku 113
Si bo no ta wòri pa papia Ingles òf Hulandes, tin un chat 24/7 disponibel pa prevenshon di suisidio.
